I le atoa ai i le masina nei o Iulai o le tausaga o le nofoaiga a le faigamalo a le vaega faaupufai o le Faatuatua i le Atua Samoa ua Tasi, o le Aso Toonai na te’a nei na tuua ai le atunuu e le tamaitai Palemia le afioga Fiame Naomi Mata’afa, mo lana usugafono muamua i le fono lona 51 a ta’ita’i o Malo o le Pasefika, ua usuia i le vaiaso nei i le atunuu o Fiti.
O le fono muamua foi lea ua faato’ā feiloa’i ai ta’ita’i o Malo e 18 talu mai le fono mulimuli i le tausaga e 2019 sa talimalo ai le Malo o Tuvalu. E le’i faataunuuina ni fono a ta’ita’i o le Pasefika e aofia ai Niu Sila ma Ausetalia i le tausaga e 2020 ma le 2021 ona o le tapunia o tuaoi faavaomalo uma o atunuu e mafua i le pipisi o le faama’i Koviti-19.
O mataupu o loo laualuga i le lisi o mataupu o le a talanoaina o suiga tetele o le tau ma aafiaga o atunuu laiti ma sootaga o malo laiti o le Pasefika ma atunuu tetele aemaise i sootaga faavaomalo ma le Malo o Saina. O se tasi o mataupu o le a faamautu i le fonotaga o le teva a nisi o malo o le atu maikoronisia lea ua faamautu e toe foi ane o atunuu e fa o sui o le faalapotopotoga o Malo o le Pasefika, peitai ua faamaamulu lava le Malo o Kilipati, e pei ona faailoa e le Peresetene o lea Malo i se tusi ua tauaaoina e le ofisa o Malo o le Pasefika.
Ae i le malaga atu o le tamaitai Palemia o Samoa mo lea fonotaga faavaomalo, ua faaauau ai ma le faiga faavae fou tau i le puipuiga o le saogalemu o le ta’ita’i o le Malo i le malaga ai ma se leoleo sinia na te faatinoina tiute o le puipuiga.
O se fono muamua foi lea a ta’ita’i o le Pasefika ua malaga ai se Malu o le Malo ma o se faiga faavae fou na amata faatino i le uluai malaga taualoa a le tamaitai Palemia na afea ai Niu Sila talu ai nei, faapea ma lona auai i le fono a ta’ita’i o Malo o le Taupulega a Peretania tele.
O lea faiga faavae tau i le puipuiga e pei ona sa faailoa e le Palemia i le Palemene talu ai nei, na amata e le ta’ita’i o le Itu agai ina ua sii gasegase atu i Niu Sila i ni masina e le’i mamao atu ma talosagaina ai le malaga ai ma se Malu o le Malo.
