Ua folasia nei e le malo se paketi fou e agai sao i le mataupu e tali atu ai i talavou solitulafono, fausia o nisi o tulaga ua mae’a faatulaga e faatatau i lea mataupu ma le faamoemoe ia maua nisi talavou faaopoopo i aoaoga, polokalame faaleaoaoga ma galuega foi.
Ua ioeina e le minisita o leoleo ma aoga o Chris Hipkins o le mataupu lea i soligatulafono a talavou, youth crime o se mataupu o loo tulai mai i le taimi nei aemaise lava i Aukilani ma ua ta’ua o le paketi lenei ua faia ina ia motusia pe faamuta ai lea faataamiloga.
O le ituaiga solitulafono ua taatele i le taimi nei e aofia ai talavou o ram raids poo osofaiga ia ua matele ina faaaoga ai taavale e faaleaga ai pisinisi ma gaoia ai meatotino.
O se vaega la o le Better Pathways Package o tamaiti uma e tai 14 tausaga ma lalo ane i Counties Manukau ma West Auckland e maua o aafia i ia solitulafono o le a tuuina sao i le Social Wellbeing Board for intervention latou te feagai.
E 23 miliona i le tausaga o le a agai sao i le polokalame a le Youth Guarantee lea e lagolago ai talavou 16-19 tausaga e leai pe maualalo foi agavaa ina ia toe auai i aoaoga.
O le isi 4.85 miliona o le a tuuina mo le Akonga Fund lea e fesoasoani ai i talavou 12-21 tausaga e aafia i le koviti ina ia faatumauina pea i aoaoga.
E 23 miliona o le a agai foi i le faalauteleina o le He Poutama Rangatahi initiative lea e agai i fesoasoani i le komiuniti mo talavou 15-24 tausaga i le sailia o galuega.
