O Niu Sila lea ua faaopoopo ane i nai atunuu ua foaiina tupe i atunuu tauatiae mo mea na faaleagaina ma ma’umau ona o suiga o le  tau.

O le minisita o suiga o le tau James Shaw faatasi ai ma le minisita o le va i fafo a Niu Sila, Nanaia Mahuta ua o la folafolaina le 20 miliona e fesoasoani ai i atunuu tauatiae.

E pei ona lipotia atu muamua i talafou o loo finau atumotu o le Pasefika ma isi atunuu ia maua ni taui o aafiaga mai kasa oona mai atunuu tetele ma maumea mo le fia selau tausaga sa faalogoina ai e atumotu laiti aafiaga.

O atunuu maumea e pei o Amerika ma Europa ua faaauau pea ona o latou teena ia finauga peitai ua faailoa e Niu Sila o le vaega tupe ua faamatuu mai e atagia ai le malosi tele o le latou lagolago ma le faamuamua i le Pasefika.

Fai mai Mahuta o suiga i le tau sa faamatau ai pea le soifua o tagata o le Pasefika faapea foi ma a latou tu ma aganuu, aemaise le soifua i le tino ma le mafaufau. 

Fai mai o le tupe lea e 20 miliona a Niu Sila o loo aumaia mai tupe maua mai emissions trading scheme.