Ua fai mai le pati a le National o le a iai faamanuiaga tau tupe e totogi e le malo aoao ma faatumauina ai tausi soifua faapea faatosaga i totonu o le atunuu.
O le faasilasilaga lea mai le taitai o le pati Christopher Luxon mo le lima tausaga muamua o o latou valaauina, ma e moomia le iai o se feagaiga ma le malo e mavae ai e galulue i totonu o Niu Sila.
Ao loma le faigapalota tele o se tasi lenei o itu ua fai mai le National afai ae tulai mai o le a totogi e le malo peimeni o student loan a tausi soifua ma faatosaga e oo atu i le $4500 i le tausaga mo le lima tausaga muamua.
O lea foi ua vaavaai o le a aumai e le National tausi soifua lesitalaina ma faatosaga mai fafo i lalo o visa le tumau mo le 6 masina faatasi ai ma o latou aiga e omai e saili galuega iinei.
E tasi afe tausi soifua ma faatosaga o le a aumai mai atunuu i fafo ma o le a maua foi le oo atu i le $10,000 e tapena ai le omai ma faamautu iinei.
E ese mai le lauga a le taitai o le National ananafi a o ia asia ai se tasi o falemai i Aukilani, i luga o se pepa o faamatalaga o loo faauma ai i upu a Luxon, “you have my word”.
