Ua faalauiloa e le kovana o Amerika Samoa, Lemanu Peleti Mauga ua iai nei Amerika Samoa i tulaga o faalavelave tutupu faafuasei, state of emergency i le faalogoina pea o luluga i le motu o Manu’a.
O le folafolaga mai le kovana o loo aofia uma ai le teritori e pei ona lipotia e le RNZ Pacific. Saunoa le kovana o faamaoniga ua aoina mai ua lagolago ai se mafuaaga tatau e ave ai le faamuamua i le soifua ma le puipuiga, ma ua sainia ai lea poloaiga e faamautinoa ai ua avanoa uma mea e mana’omia, resources pe a mana’omia i taimi faapenei.
Sa ia ta’ua foi le fia faafetaia o le auaunaga a i latou o loo galulue i lea foi matata aemaise ē o loo faamautu i Manu’a. Talu mai le aso 26 o Iulai na amata lipotia mai ai le faalogoina o luluga o mafui’e ma ua faailoa foi e le US Geological Survey o le maugamu i le motu o Ta’ū e mafua ai.
O molimau a i latou o loo aumau i Ta’ū ua ta’ua ai e faalogoina pa’ō leotetele ma luluga i le taimi o le po ma e lagona ua iai i se tulaga lamatia le soifua.
Ua faamanino foi e le kovana ia i latou o loo aumau i motu aupito i lamatia ua galulue nei le malo i le faatinoina o gaioiga uma mo le aveesea mai o i latou i nofoaga saogalemu.
