Ua avea nei le afioga Pepe Christian Fruean ma fetu pupula o le Kerisimasi i fanau ua sauaina o loo tausia ma vaaia e le Toomaga mo ē Puapuagatia, ina ua faia se meaalofa a lea tamalii mo ia fanau, ua ave uma iai seleni sa fuafua le kamupani o le Digicel e faia ai le latou faamavaega ma Pepe ua malolo litaea mai lea kamupani o telefoni feaveai ma fesootaiga faaonapo nei.
E lei faailoaina mai e le Toomaga i lana pepa o faamatalaga le aofaiga o le seleni o lea agalelei, ae o le taimi o avea lea tamalii ma Pule o le Digicel na ia amata faavaeina ai se sootaga ma le Toomaga i le autu e lagolago le galuega a lea faalapotopotoga tuma’oti o loo faia galuega fesoasoani i fanau ua sauaina.
Na talia e le Digicel le manao o Pepe ina ia aua ne’i faia se latou faamavaega ae ave uma seleni sa fuafua e faaalu i le latou fiafia faamavae mo le nofoaga o le Campus of Hope o loo tausia ai fanau ua sauaina.
Na masii le pulega o le kamupani faatasi ai ma le afioga Pepe Christian Fruean e momoli le meaalofa i le Peresetene o le Toomaga a o molimauina e fanau o loo i le nofoaga i Tuanaimato.
