O Samoa na aumai iai galuega o le tuufaatasia o uaea o taavale afi a le kamupani o le Yasaki ma o ni tausaga tāua lea i le tamaoaiga o le atunuu auā sa maua ai galuega, ae selesele ai foi nisi o le ‘aufaipisinisi fale’aiga ma le ‘aufaipasi la’upasese.
Ua alu alu lea tautua muta ina ua toe foi le kamupani, ae o le mafutaga a Samoa ma le Yasaki o loo faaauau pea.
O le vaiaso nei o loo iai i lo tatou atunuu le Pelesetene o le Yasaki Kizuna Foundation i le autū o le fia faia o ni foa’i o taavale mo le Lakapi Samoa lea ua foa’i i le pasi faamalū ma se loli Dyna auā galuega o le atina’eina o le taaloga lakapi.
Na foa’i ai foi e le Pelesetene o lea kamupani agalelei se pikiapu fou mo le asosi o pisinisi o loo latou toe faia se galuega tāua i otaota lafoa’i ina ia faasaoina ma puipuia ai le siosiomaga o Samoa.
Faaalia e le Pelesetene o le Yasaki Kizuna Foundation o lana foa’i mo le Lakapi Samoa o le a mafai ona fesoasoani ai i galuega o le atina’e o le taaloga.
O le itu mautinoa e lē fesiligia o se isi lea faamāmā avega mo le Lakapi Samoa o loo feagai ma faafitauli tau tupe, ona o taavale ua latou maua e lē taugofie.
E faapena foi le taavale ua tuuina atu mo le asosi o le Recycling and Waste Management.
O le ta’ita’ifono o le Lakapi Samoa le susuga Tuilaepa L Sailele Malielegaoi na ia molimoli le faafetai i le pelesetene o le Yasaki Kizuna Foundation ma lana ‘aumalaga i le agalelei ua afea ai le pulega o le taaloga lakapi i lo tatou atunuu i ni foa’i taugata ma anagata.
