E 220 afe tupe Ausetalia e maua ai le 390 afe tala Samoa ua foai e le Malo o Ausetalia e fesoasoani ai i tapenaga a le tatou Manu Samoa mo le Ipu o le lalolagi i Farani.
O se foai na faailoa e le Minisita o le atina’e a lea Malo le susuga Pat Conroy, ina ua feiloai atu i le taitaifono o le Lakapi Samoa le susuga Tuilaepa L Sailele Malielegaoi, ma le pulega o le lakapi Samoa, i le Aso Tofi o lenei vaiaso.
Faaalia e le Minisita i le faalauiloaina o lea fesoasoani tau tupe, e tāua i lona Malo le atina’e o le lakapi ma o le mafuaaga foi lea o lana fesoasoani i lo tatou atunuu i le siitia o le atina’e o taaloga, e le gata i le lakapi iuni ae o le lakapi liki.
O le agaga faafetai o le taitaifono o le lakapi Samoa na ia molimoli ai le faafetai i le alii minisita o Conroy ona o le silasila pea o lona Malo i le va nonofo ai ma atunuu tau atina’e e pei o Samoa, e manaomia tele fesoasoani tau seleni mo le faaleleia ma le siitia o le taaloga lakapi mo alo ma fanau o le tatou atunuu.
O le afiafi o le Aso Tofi na toe tuua ai Samoa e le Minisita ma lana aumalaga ina ua mae’a faatino lea foai, ma nisi o asiasiga i poloketi ma atina’e o loo fesoasoani mai iai le Malo o Ausetalia, e pei o le Matagaluega o leoleo, falepuipui ma le ola toe fuataina.
