O le lē maua o ni totogi faapea itula faasili poo ovataimi o nisi ia o māfua’aga ua faailoa e se molimau e le’i mafai ona faamaonia na māfua ai ona leai nisi o le aufaigaluega o le umukuka o le maota gasegase i Motootua na oo atu e faatino le latou auaunaga masani auā le mālū o le taeao mo gasegase o loo taofia i le falema’i i Motootua.
Faaalia e se molimau faatuatuaina na te’a le taimi masani o le taeao e toso atu ai le tololi e leai ni taumafa na oo atu.
E le’i manuia sa’iliga i le pulega o le maota gasegase mo se faamatalaga i le māfua’aga o lea tulaga, ae na ta’ua e se molimau faatuatuaina o se auaunaga tuma’oti e saunia ma gaseseina taumafa na sulufa’i iai le pulega o le maota gasegase mo se fesoasoani.
E le’i maua se finagalo o le pulega o le matāgaluega o le soifua mālōlōina aemaise o le falema’i o Tupua Tamasese Meaole i Motootua mo se faamatalaga i totogi ma ovataimi o le aufaigaluega i le umukuka, e pei ona laumanu’ia i se lipoti o le māfua’aga o le faaletonu.
Mo le silafia o loo faasoasoa tupe a le malo i le taimi nei i aiaiga o le fuafuaga tau tupe faanatinati poo le emergency budget ma le faamoemoe e mae’a lea tulaga i le faai’uga o le masina nei, ma amata faaaogā ai tupe masani o le a pasia i le tala autū o le tupe o le a talanoaina e le Palemene i le vaiaso a sau.
