E fitu pine a Samoa na maua i le taaloga teuteu tino poo le body building i le vaega o alii ma tamaitai, lea e 4 pine auro 1 le siliva ma apa memea e lua.
E lua pine auro a Samoa na manumalo ai le tamaitai o Rosie Matautia 2 foi auro na manumalo ai le alii o Lafaele Aukuso o loo umia le siamupini o le taaloga teuteu tino i le Pasefika.
O John Lemoa na manumalo i le siliva ae o Jeremy Vaepule ma Petelo Leota na manumalo i pine apa memea e lua.
O le au teuteu tino a Samoa na malaga mo taaloga a le Pasefika i le Aso Toonai na tea nei faatasi ai ma le isi vaega o le autaalo a le atunnuu.
I le mae’a ai la o taaloga o le Aso Gafua o lenei vaiaso ua tulai mai ai o Samoa ua saofai nei i le tulaga tolu i le aofaiga o ana piner auro e 27, 14 siliva ae 12 apa memea.
O le aofaiga o pine ua maua e le ‘au masii a le atunuu e 53.
O Niu Kaletonia o loo tumau pea i le tulaga muamua e 63 pine auro, tulaga lua Ausetalia e 29 auro ae o Tahiti ua see ifo i le tulaga fā e 25 ana pine auro.
O Fiti o loo i le tulaga lima e 12 ana pine auro.
