Ua ta’utino le Palemia o Fiti, Sitiveni Rabuka e lē o sauni lana faigamalo mo totogiga lafoga faaopoopo poo tariffs a Trump lea ua faalauiloa mai i le vaiaso nei.
E 10 pasene le totogi faaopoopo o le a tuuina i luga o oloa e auina atu i Amerika.
Fai mai le Palemia i le Fiji Times e le’i vaai mamao lona atunuu i se tulaga faapea e ono oo ane ma e fai si faigatā o faiga filifiliga o le a faia.
Fai mai Rabuka o le a tatau loa ona vaavaai i nisi maketi fou mo a latou oloa e auina atu i fafo.
Ta’ua e le Palemia o le itu e lelei ai ona o loo iai foi nai a latou atunuu faauo i le lalolagi o le a vaavaai iai mo se fesoasoani.
I se pepa o faamatalaga mai le malo ua ta’ua ai o loo galulue soosootau’au pea ma sui o le malo o Amerika e sa’ili sina tulaga e faaitiitia ai aafiaga o faiga totogi faaopoopo nei i le soifua o tagata i aso ta’itasi.
Ua faailoa foi i le pepa o faamatalaga ua tuuina foi la e Fiti tiute totogi mo oloa auina mai Amerika.
E to’atele atunuu ua faamamalu ai totogi faaopoopo ia a Amerika e aofia ai foi ma Samoa e 10 pasene foi o loo tuuina ai i oloa e aveina atu i Amerika.
Puna o Faamatalaga: https://www.rnz.co.nz/international/pacific-news/557158/trump-s-tariffs-fiji-to-roll-with-the-punches-rabuka
