Ua lipotia e le RNZ Pacific i le asō e iai le shareholder o le Samoa Breweries Ltd o loo manao i le malo ina ia fai se gaioiga e taofi ai pea le pia o le Vailima i le atunuu.  

Fai mai le lipoti o le parent company o le kamupani lea na o latou folafola i se taimi e lei mamao atu o le a faasee le gaosiga o le oloa i Fiti ma o le a aafia ai le pe ā ma le 50 o avanoa faigaluega.  

O le Samoa Breweries Ltd e pei ona ta’ua e le RNZ e umia e le Paradise Beverages Ltd se vaega tele ma ua faailoa e le alii pule Mike Spencer i se pepa o faamatalaga i le leitio faavaomalo e lē māmā ia te ia le faai’uga ua faia.  

O Muagututia Lafaele Ngau Chun o le isi lea shareholder o le kamupani ua ia valaau nei e pei ona lipotia i pule o le kamupani o loo i fafo mai o le atunuu ina ia toe faatau atu le pia a le vailima i le atunuu auā o loo faasalalau i le lalolagi le avamalosi lea o le Taste of Samoa. Ua lipotia e le Fiji Times o le a amata galuega a le Vailima i Fiti i le masina o Oketopa.