Ua faaopoopo lagona lē fiafia o nisi o sui o le sosaiete a loia i Samoa i le faamatalaga faalaua’itele mai le sosaiete a loia i le atunuu ua faailoa ai atugaluga o le sosaiete i le tauave e le Palemia o le tofiga minisita o le matāgaluega o leoleo, falepuipui ma le toe fuata’ina ma le ofisa o le Loia Sili ae o loo taoto i le faamasinoga ni moliaga o le ta’ita’i o le malo faapea nisi moliaga e le’i oo i le taimi e su’esu’eina ai e le faamasinoga.
Ua faailoa e le susuga Papalii John Taimalelagi Afelē i sona finagalo i le upega tafa’ilagi o fesoota’iga le api o foliga ua lē talafeagai le fesiligia o tofiga faaminisita o le palemia, ma o se tulaga ua lē talafeagai ma o se laasaga ua oia ai le tofiga o le sosaiete o loo umia e le Pelesetene.
Ua finauina ai e Papalii o se loia ma se sui o le sosaiete le faamavae o le tama’ita’i loia o Fiona Ey o loo tauaveina le tofi pelesetene.
Ua faailoa foi se lagona o se loia sinia le tofa Unasa Iuni Sapolu ma ua ia lē talia le aiāina fua e le sosaiete o tofiga a le Kapeneta ae tatau ona galulue faatasi ma le malo i ni fautuaga faaletulafono e tāpā ai se lagolago atu a le sosaiete.
Ua faailoa e ia sui o le sosaiete la te lē taliaina le faamatalaga faalaua’itele ona e le’i tāpā ni manatu o sui o le sosaiete.
O le masina o Me o le tausaga nei na filifilia ai e le sosaiete a loia i Samoa le tama’ita’i loia o Fiona e avea ma pelesetene ma ua sui tulaga i le susuga i le loia o Alex Su’a sa seei i le tofiga.
