Ua maea le fonotaga tele a malo o le lalolagi le COP26 na lotolotoi ai ma le leo o Samoa ma isi atunuu o le Pasefika i le finauina o Mālō malolosi ina ia faaititia a latou kasa oona ua velasia ai le afuafua o le lalolagi.
E pei ona silafia o nei gaioiga e ala i kasa oona e faaleagaina ai le afuafu ma mafua ai suiga o le tau ua tele ina mafatia ai atunuu laiti o le Pasefika e aofia ai ma Samoa i mala faalenatura.
Taua e le taitai o le atunuu le Tamaitai Palemia “Ua amata lava ona tuputupu le lagona i le lalolagi e oo foi i Mālō tetele lenei e ona ia ituaiga oa ua latou molimauina ma ua aumai pea faamaumauga Mai e o loo iai le tomai faapitoa faasaienitisi ua ta’u mai ai ua agai atu i se tulaga e ono tupu se mala mo le paneta pe a faapea tatou te lē toe faafoi mai le paneta i sona tulaga ua toe teuteu ia itu uma o le laueleele aemaise foi ia o tatou ogasami.”
Taua foi e Fiame Naomi Mataafa “Mo i tatou i Samoa o le fesili, O a a tatou gaioiga o loo fai ina ia o tatou puipui mai le tatou siosiomaga ma le tatou taumafaiga ina ia tatou lē faaopoopoina foi i le itu lea o le faavevelaina o le tatou pianeta e ala lea i nisi kasa oona, ma o le tatou taumafaiga pito tele o le see ese lea o le tatou faaaogaina o suauu mai fafo ma o lea ua iai se fuafuaga na amata mai i le faigamalo talu ai ma ua manatu foi le tatou Mālō fou e ao ona faaauau ina ia oo atu i le tausaga 2025 ua mafai ona tatou faaaogaina le eletise e maua mai i malosi faafouina.
E pei ona silafia e le atunuu o loo tele le eletise o loo maua mai i le suavai faapena foi ona maua mai le eletise i le la ma ua tatou faatautaia foi i malosiaga e maua mai i le savili”.
O le amepasa o Samoa i Niu Ioka na fai ma sui o Samoa ma le Malo i lea fonotaga faatatau i le
suiga o le tau le COP26 na usuia i Glasgow i Sikotilani.
O se fonotaga na o gatasi ma le polokalame faatino mo le vaiaso o le Siosiomaga lea na faamanatu i le vaiaso na tea nei. O se tasi o fuafuaga taua e faamanatu i tausaga taitasi le taua o taumafaiga uma i le puipuia lea o le siosiomaga ma faasao alagaoa faalenatura.
