O loo talitonu lē sa avea ma Peresetene o Faamasinoga o Fanua ma Suafa, o le tusi atu a le Palemia i le aso 20 o Oketopa ma faailoa atu le faamutaina o lona tofiga, ae faamautu atili i le isi tusi o le aso 29 o le masina lava ua tuanai atu nei o Oketopa, e mauaa pea lana mau e le feaiāa’i le vaega 67(6) o le Tulafono fou o Faamasinoga o Fanua ma Suafa ma le aiaiga o le Tulafono Faavae, e avanoa ai ona aveesea lona tofiga Peresetene e le Ao o le Malo, pe a maua le ioega o le 2 vae 3 o nofoa o le Palemene.

O le isi mafuaaga ua ia faailoa e aveesea ma faamuta ai lona tofiga, pe afai ua le mafai ona tauave ona tiute o le Peresetene o Faamasinoga o Fanua ma Suafa. Peitai o lana matau e lē o le tulaga lea sa faailoa atu e le taitai o le Malo.

O lea finagalo o Fepuleai o loo faaalia i sana pepa o faamatalaga na faalauaitele i le Aso Sa na tea nei, ae o lea faatoa taulimaina se kopi o lea pepa o faamatalaga.

O le palakalafa faaiu o le pepa o faasalalauga faalauaitele mai lē sa avea ma Peresetene e faitauina faapenei, “Ae pe taumua ea i nuu lelei, pe tafea foi i moana vale, o loo soifua le Atua Pule Aoao, e pule i le ‘au ma le matagi, aua o le a foi le sa e ulitu i le faatumana o le ava ma le fe’ai  i’a o ataata sala, e opomoa ma totoe lona alofa lavea’i e uliga’i ai faataumatagi”.