E malosi le finau ma le tuuina atu o le finagalo faaalia o se tasi o taitai sinia i mataupu faapolokiki a Fiti, Biman Prasad o ia foi o le Sui Palemia o Fiti ma le minisita o Tupe, i se fonotaga o loo iai nei i Canberra.
Fai mai o le lauga a Prasad ua valaau ai ia Ausetalia ua alagatatau lava ona aveesea sā o visa o loo iai i luga o tagata Pasefika ma ua ia lapatai ane ai foi i mataupu e faatatau i le tau ma ona suiga.
O Prasad o se tasi o le faigamalo a le Palemia o Sitiveni Rabuka ma e malosi lana finau ia aveesea le talosaga o tagata Pasefika mo ni visa e malaga mai ai i Ausetalia lea e tetee pea iai le Palemia o Ausetalia, Anthony Albanese.
Finau Professor Prasad e tatau ia Ausetalia ona faia sana faaiuga pe fia avea moni ma aiga o le Pasefika ma o se tasi lea o manaoga o le Pasefika ina ia faaaofia Ausetalia o se sui o le aiga Pasefika, e lē tatau la ona iai ni visa ma e tatau ona feoai saoloto tagata Pasefika uma, e lē na o se vaega.
E lē o faailoa i le lipoti a le ABC se finagalo faaalia o Ausetalia i le saunoaga a le sui Palemia o Fiti.
