Ua mae’a ona fofogaina molimau a leoleo e lagolago ai moliaga o le umia o le pauta faasāina o le ‘aisa le methaphatamine, umia o laau malosi e le faatagaina i Samoa, ma le umia o paipa e fesootai i le solitulafono o fualaau ma pauta faasāina, o loo tuua’ia ai se tasi o sui komesina o faigapalota le susuga Afualo Daryl Mapu, ma se tamaitai o lea ofisa o Marie Fanueli.
Peitai ua iai nei le talosaga a le loia a Daryl Mapu ua lu’i ai le lē lava o ni mau a leoleo e lagolago ai moliaga, poo le no case to answer.
O le Aso Faraile na tea nei na faamae’a ai molimau a le itu tagi ma folasia ai loa lea talosaga, lea ua faatulaga o le Aso Lua o le vaiaso nei e faia ai le folasaga a le tamaitai loia le afioga Magele Leone Su’a Mailo, e fofola ai mau faaletulafono e faave ai lana lu’i i le lē lava o mau ua tuuina atu e leoleo e faamaonia o Afualo Daryl Mapu e ana ‘aisa, umia o laau malosi ma paipa, faapea le umia o ututau lea na maua e leoleo ia vaega uma i le fale o lē ua molia i le osofaiga poo le raid ia Tesema o le tausaga na tea nei.
