Ua finau le loia o loo tauaveina le talosaga a le vaega faaupufai e puipuia aiātatau a tagata i le fia auai i le faamasinoga o sui faipule e toatolu ua faamavae ma lea pati faaupufai, e tatau ona tali le vaega faaupufai i ni tuuaiga ua faaalia e nisi o ia sui faipule ia latou faamatalaga tusitusia poo affidavit.
Na faailoa e le loia le susuga Sefo Ainuu, e iai vaega o faamatalaga tusitusia o loo atagia ai le tuuaiga e faapea na mafua ona faia teuteuga i le faavae ma aiaiga o le tulafono o faigapalota i le avanoa o se nofoa pe a faamavae se faipule mai lana vaegafaaupufai ina ia faatumau ai pea le malosi o le pati o le HRPP e tauaveina le pulegamalo.
Peitai ua finau le loia o Muriel Lui o loo tulai mo sui faipule le tofa Ale Vena Ale, Tu’uu Anasii Leota ma Mau’u Siaosi Puepuemai, e lē o le autu lea o le finauga ua mafua ai ona ave e le Fofoga Fetalai le mataupu mo se finagalo o le faamasinoga.
Faailoa e le tamaitai loia i lana folasaga afai e tatala le avanoa lea, o le a le tusa ai ma aiaiga faaletulafono o loo lima taitaiina ai galuega a le faamasinoga i ni mataupu tau tulafono e finauina.
O le Aso Faraile nei ua tuu avanoa ai le faamasinoga i loia a itu auai e tuuina atu ai nisi faamaumauga tau tulafono e avea ma taiala e fua iai se faaiuga ona maua ai lea o se tali i le talosaga i le fia auai o le pati faaupufai e puipuia aiātatau a tagata i le suesueina o le mataupu ua tuuina atu ai e le Fofoga Fetalai le faamavaega a sui faipule e toatolu mo se iloiloga faaletulafono a le Faamasinoga Sili.
