O loo una’ia e le vaega faaupufai a le National le faigamalo ina ia faatoese i le mae’a o le tuuina ane o se faai’uga a le su’etusi sili i le mataupu e faatatau i le tufatufaina o peimeni e fesoasaoni ai i aiga e maualalo le tamaoaiga i Niu Sila ma le tulaga o loo iai nei le tau o le soifuaga.
Ua ta’ua i le lipoti a le RNZ Pacific le unaia o le su’etusi sili ina ia su’esu’eina le mataupu lea ma sa faia le su’esu’ega ma faai’u ai e faapea o peimeni sa faia i tagata e lē agavaa ma sa tatau i le malo ona silasila ma le toto’a i le tufatufaina o ia seleni.
Fai mai nisi na maua lea peimeni e tagata o loo nonofo i fafo atu o Niu Sila ma i nisi foi tulaga na oo ai foi le tufa i tagata ua maliliu e pei ona ta’ua i le lipoti.
Fai mai la sui o le National o lea ua faailo e le su’etusi sili le faaletonu lea ma ua tatau ona faatoese ai le malo.
Ua faailoa foi i lipoti o le taimi nei o loo galulue le ofisa o lafoga ia faamautinoa e lē toe maua e tagata Niu Sila o loo aumau i fafo atu o le atunuu le vaega lona lua o le peimeni lea e fesoasoani i le tau o le soifuaga, o le vaega lona lua o le peimeni e maua i le Aso Tofi o le vaiaso nei.
