Ua i luma nei o le faamasinoga se talosaga a loia a leoleo e toe tolo ai le suesueina o a latou molimau e lagolago ai moliaga e 83 o le lima tagoese a o avea ma tagata faigaluega faasaga i se tasi sa galue i le matagaluega o faamasinoga ma le faafoeina o mataupu tau faamasinoga.

Ua savalia nei le 3 tausaga talu ona molia e leoleo Sera Skelton. O le isi tagata sa faigaluega i lea matagaluega i le vaega o tupe i le auaunaga lautele le corporate service o Hana Fuatavai, ua toe faaui i tua e leoleo moliaga ona o le a molimau e lagolago tuuaiga o Sera.

O le Aso Gafua o le vaiaso nei na faatulaga e valaau ai mau a leoleo ma mau a lē ua tuuaia e lagolago ai lana tetee peitai e toalua nisi o loia a leoleo o loo malaga i ni fono tāua i fafo, ma le manaomia e loia a leoleo o nisi faamatalaga tusitusia mai le molimau o Hana ua toe talosaga ai e tolopo.

O i tonu ua faavae ai le tetee a le loia a lē ua molia ma talosaga ai e faaleaoga moliaga uma ona ua solia e leoleo aiaiga o Tulafono i le faagaioia o mataupu e tuuina atu mo suesuega a le faamasinoga i le umi o toso ma talosaga pea e tolo.

O le isi itu o le toe ave o se isi avanoa e tolopo ai, o le a noatia ai le maua e lē ua molia o se faamasinoga tonu e tusa o ona aiātatau.

E silia i le 3 selau afe tala se seleni a le matagaluega o faamasinoga na aafia i le tuuaiga ua faasaga i lē ua molia.

Ua tālia se faaiuga pe talia le toe tuu atu o le suesuega o moliaga e 83 i se isi masina o lenei tausaga.