Ua lipotia i le Leitio faavaomalo a Niu Sila i le asō e iai tagata faigaluega malaga mai i le atunuu nei, migrant workers ua maua a latou galuega i se kamupani i Southland i lalo o visa o loo faaagaga mo tagata faigaluega e iai tomai e pei ona faamatala mai e le Meat Workers Union.

Fai mai le lipoti o tagata ia e itiiti pe leai foi se agavaa i le galuega lea.

Ua valaau ai nei la le Iuni lea ia faia se suesuega pe moni e iai ni tomai ma ni silafia o migrant workers nei ua faafaigaluega e le Alliance Group i le latou lala i Lorneville ae pe o faasoloatoa foi lea tulaga.

O loo teena e le Alliance Group ia faamatalaga, fai mai o ana tagata faigaluega uma na malaga mai i Niu Sila sa iai le tomai faavae sa manaomia mai e le Immigration.

Ua faailoa i lenei lava lipoti le finau ane pea o le failautusi o le iuni, Daryl Carran e faapea o le toatele o ē o loo faigaluega i le kamupani lea e itiiti pe leai foi ni tomai i le galuega ina ua taunuu ane i fanua.

Fai mai e lei maua e le ofisa o Femalagaa’iga a Niu Sila ni tulaga o ni tagata faigaluega i le Alliance ae leai ni agavaa ma o le mafuaaga lea ua le faia ai se suesuega.