O se alii faipisinisi o se tagatanuu o Niu Sila ua sefulu tausaga o faamautu i Samoa, o loo taoto nei i le faamasinoga sana tagi o se su, faasaga i le faatauina ese o lana masini uapato poo se excavator e aunoa ma sona maliega.

Ua tuuaia ai se alii loia o loo umia le tofi faipule o le Palemene le afioga Tuala Tevaga Iosefo Ponifasio i lea gaioiga, ae o loo tetee malosi iai lea tamalii.

E lei suesueina le mataupu, ona ua taatia atu nei i le faamasinoga se talosaga a le loia a Tuala, ina ia totogi muamua e lea alii Niu Sila o Allan Belcher le vaegatupe e 15 afe tala, e faamautu ai a faapea e faia’ina lana tagi, e na te gafatia ona totogi tau o le faamasinoga mo le itu o loo ia tuuaia.

I taualumaga o le suesueina o le talosaga lenei, na faailoa ai e le loia le afioga Fuimaono Sarona Ponifasio, e matuā leai ni mau o mafai e lea alii faipisinisi ona ia tuuina atu e faamautu ai o loo iai ni ana teugatupe.

E leai foi ni mau ua ia faailoa atu ai, ni ana aseta poo meatotino, e oo lava i lana masini uapato o loo ia tuuaia ai le afioga Tuala e le o iloa poo fea o iai, e faapena foi i ni ana taavale se fā e le o iloa poo le ā le lelei atoatoa o iai, ae pe fia foi se tau e mafai ai ona faatau ese atu.

O Belcher ua silia aso e nofo ai i Samoa poo se overstayer, e pei ona tuuina atu e le itu talosaga ni faamaumauga o lona tusifolau ua faaalia ai ua uma le aogā po ua expire.

O loo teena e le alii faipisinisi e ala i lana loia le talosaga e faavae i lana finauga ua sefulu tausaga o aumau i lo tatou atunuu.

O le aso 14 o le masina fou e toe fofogaina ai le mataupu ma e tatau ona aumai ai ma se faaiuga.