O se tasi alo o Samoa, Levi Aumua ua faamaonia mai lona agai i le Crusaders i le isi taamiloaga o le a sosoo mai o le taaloga o le lakapi.

Ua faailoa i lipoti a le One News sa manaomia foi e le Blues le alii o Aumua lea foi sa taalo ai muamua ma ua faailoa ua saini lana konekarate e lua tausaga ma le Crusaders ma o lona faamoemoega ia maua sona avanoa i le All Blacks. 

O Aumua ua 28 tausaga o le soifua ma taalo mo le Moana Pasifika talu mai le tausaga talu ai, taalo foi mo le Chiefs i le 2018, Blues i le 2019.

Fai mai le lipoti o Aumua toeitiiti atoa le 50 o ana taaloga mo le Tasman Mako ma sa fili i le All Blacks XV mo le latou malaga taamilo, le Northern Tour ma ua faailoa i le lipoti fua i lana taalo i le taaloga i le taimi nei e ono iai se avanoa e faaaofia ai i le ‘au a le faiaoga Ian Foster mo le Ipu o le lalolagi.

Saunoa le pule o le Crusaders Angus Gardiner, o Aumua o loo tulaga maualuga ona faamaumauga i le taaloga ma e fiafia tele i lona agai atu i le kalapu.

I le agai ese ai o Aumua mai le Moana Pasifika sa ia faailoa ai faatoa iai lea i se ituaiga ‘au faapea ma o le a manatua pea lona taimi ma le mafutaga i le Moana.