I le mae’a o le ono tausaga sa avea ai ma Pule o le Nofoaga mo Suesuega Faasaienisi a le Malo i Nafanua le susuga Seuseu Dr Joseph Tauati, o lea ua see atu nei lea tamalii e tauave le tofiga Ofisa Sili o le pulega o le matagaluega o Faatoaga ma Faigafaiva.

Ua suitulaga ai o ia i le afioga Tilafono David Hunter sa avea ma faauluuluga o lea matagaluega tāua a le malo, ae ua faamavae. O Seuseu Dr Joseph Tauati sa amata galue i le matagaluega o faatoaga i le tausaga e 2002 ma sa tautua ai o se ofisa mo le vaega e puipuia oloa feaveai mai faamai ma iniseti faalafuā ma faasolosolo ai ina siitia lona tulaga i le galuega.

O le tausaga e 2011 na see atu ai e galue i le faalapotopotoga o suesuega faasaienisi le SROS o se tasi o ofisa suesue sinia ma iu ai ina filifilia e avea ma Ofisa Sili o lea faalapotopotoga a le Malo i le tausaga e 2017 seia oo ina filifilia e faauluulu iai le matagaluega o faatoaga ma faiga faiva. 

O loo umia e Seuseu faailoga Tikeri i tulaga tau faatoaga mai le Iunivesite o le Pasefika i Saute, faailoga o le Matua o Faiva i tulaga tau suesuega o puna’oa faasaienisi mai le Iunivesite a Kochi i Iapani ma le faailoga maualuga o le Fomai o le Tofamanino (PhD) i tulaga tau Molecular Biology ma le Phytopathology mai le Iunivesite o Bristol i Peretania.