Ua filifilia nei mo le ulua’i taimi se tagata Samoa e avea ma faauluuluga o le Pulega o Tineimu i se tasi o aai i Amerika.
O le tamaitai ia Sionna Stallings-Ala’ilima, o se ulua’i tamaitai Samoa ua maua lenei tulaga maualuga, ma o se mitamitaga tele foi lea i le avea ai o ia o se ulua’i tagata e iai sona faasinomaga Samoa ua filifilia e na te ta’ita’ia se tasi o pulega i Tacoma.
E lata i le 20 tausaga talu ona faigaluega lea tamaitai i le Pulega o Tineimu.
O Sionna o se sa avea ma Sui Ofisa Sili o lea auaunaga i Tacoma i le tausaga 2022, ma i le ulufale ai o lea tamaitai e tautua i le pulega o tineimu e ala i lea tulaga maualuga, sa amata mai lava Sionna mai le tulaga maualalo poo le tulaga o le ofisa o le tineimu, faasolo mai i lona olaga tautua sa avea foi o ia ma sē e tali atu i valaau poo le paramedic, faasolo ina avea ma Lutena, Kapeteni ma o sē sa ia tautua i le fesoasoani faalesoifua mālōlōina.
I le faatautoina ai o Sionna e avea ma faauluuuluga o le Tineimu, sa molimauina e le toatele o ona aiga ma uo lea faatasiga tāua. Ma i se lipoti, sa faailoa ai e Sionna lona agaga faafetai ona o lona mauaina o se aiga ma se mafutaga sa telē lo latou lagolagoina o ia, ma ua tau ai lau o le faamoemoe.
