Ua faailoa ai nei e le faauluuluga o le Ekalesia Katoliko i Samoa le filifilia e le Tamā Paia o Pope Franisisi o loo faaao iai le ekalesia i le lalolagi, o se faifeau Pelepitelo poo se patele mai Samoa e galue faata’ita’i aposetolo i le atunuu o le Atu Malesala le afioga Patele Tamati Alefosio Sefo.
O lea tofiga ua ta’ua i le gagana Peletania o le Apostolic Prefect, ma e filifilia iai le afioga Patele Tamati o loo galue i Samoa i le palisi o Sagato Petelo Sanele poo St Peter Chanel talu mai le tausaga e 2023.
Na faauu i le tofiga Pelepitelo i le masina o Novema o le tausaga e 2004 e tusa ua 21 ai nei tausaga talu ona faauu o ia mo lea tofiga faifeau patele o le Ekalesia Katoliko.
Ua 53 tausaga o lona soifua ma na soifua mai o ia i le afio’aga o Tafitoala i Safata.
