O Paul Tito lea ua lipotia ua filifilia nei e avea ma faiaoga lagolago o le Auckland Blues. O Tito sa taalo muamua i le Hurricanes ma le ‘au a Taranaki ma sa auai foi o se tasi o faiaoga a le ‘au a Georgia lea na malo talu ai nei ia Wales.
O le asō lea ua faalauiloa mai ai lona tofiga fou lea i le Blues ae ua faailoa mai ai foi o Warren Gatland lea ua suia nei Wayne Pivac i le faiaogaulu o le ‘au a Wales.
O isi kalapu sa galue ai foi muamua o se faiaoga e aofia ai le Western Force ma le Wellington Lions i taamilosaga o le NPC ma le Ranfurly Shield.
Ta’ua i le lipoti o le mae’a o le taamilosaga a le Blues i le tausaga fou o le a toe foi ai Tito i le ‘au a Georgia mo tapenaga o le Ipu o le lalolagi.
O lona uiga la o le ‘au o faiaoga o le Blues ua iai nei e aofia ai le faiaogaulu o Leon McDonald, ma faiaoga lagolago ia e aofia ai Tito, Tana Umaga, Tom Coventry ma Daniel Halangahu.
O Tito lea ua suitulaga ia Ben Afeaki lea ua saini lana konekarate ma le Rugby New York i le malo tele o Amerika.
