O le Malo o Filipaina i se faiga paaga ma le Matagaluega o Faatoaga ma Faigafaiva, ua maua ai e se alo o le atunuu le susuga Nelson Meleisea se tasi o avanoa sikolasipi e aoaoina ai i se Iunivesite i lea atunuu mo le tomai faafomai manu.
O se tasi lea o tomai aoaoina o loo manaomia tele i le vaega o lafu manu i le Matagaluega o Faatoaga ma Faigafaiva a Samoa ona e le toatele nisi o umia lea tomai faapitoa.
O le susuga Nelson Meleisea e 6 tausaga o aoga i le Iunivesite faafomai o le Oceania University of Medicine o loo i totonu o le Iunivesite aoao a Samoa, peitai ua ia faailoa i se pepa o faamatalaga, e lei manuia lona taumafai.
O le avanoa ua ia toe maua e aoaoina ai e avea ma fomai manu, o se isi lea avanoa mo ia e toe taumafai atili ai.
E filifilia mo lea aoaoga o loo galue i le vaega o le ola manuia o lafumanu i le polokalame o le SAFROM poo le Samoa Agriculture and Fisheries Productivity and Marketing Project.
