I le uluai faavaeina o le Iunivesite Aoao o Samoa i le tausaga e 1984, tusa ai nei ma le 38 tausaga talu ai, o lea ua faamaonia ma talia e le kapeneta le filifilia o se uluai tamaitai o le atunuu e avea ma Pule o le Iunivesite Aoao o Samoa mo le umi o lana konekarate e 3 tausaga.
O le Aso Tofi o lenei vaiaso na faailoa ai le filifilia o le afioga Tuifuisaa Patila Malua-Amosa e avea ma Pule fou o le iunivesite a le atunuu, ma o se tofiga ua faaalia i se pepa o faamatalaga mai le ofisa sooupu o le Malo, na fulisia iai le ioega a le Kapeneta.
O ia o se tasi o faiaoga ua 30 tausaga o galue i le Iunivesite Aoao a Samoa, e le gata o se faiaoga, ae ose tasi sa lotolotoi i suesuega ma sailiiliga poo se researcher.
O loo ia umia le tulaga o le Associate Professor, ma o le fautuaga mai le laulau na feagai ma le faatalanoaina o i latou na tusi talosaga, o loo faailoa ai i le pepa o faamatalaga, o Tuifuisaa Patila Malua-Amosa, o le a ia mafai ona unaia faiga faavae o manulauti a le Iunivesite ua faataoto, mo le lima tausaga o lumanai.
O se tasi o faaiuga a le Kapeneta ua faailoa lautele, o le toe tofia o le susuga Iuli Moefaauo Salale Moananu e avea ma Ofisa Sili o pulega o le Samoa Sports Facility Authority mo le isi 3 tausaga.
O le 12 tausaga ua tuanai sa seei ai lea tamalii i le tofiga ma ua toe ave iai le faatuatuaga o le Malo nate pulea ai malae ma fale taalo faapea isi auaunaga uma e fesootai i le faagaioia o nofoaga e faatino ai taaloga i Samoa.
