O le Lakapi Samoa o se tasi o faalapotopotoga ma auaunaga tau taaloga i le atunuu ua aofia i le to’afā o faalapotopotoga tuma’oti, ua vaevae iai le vaegatupe e selau afe tala, mo le faia o polokalame e faatāua ai le tetee atu i le sauāina o tamaitai ma fanau teine laiti i lo tatou atunuu.
Faaalia e le Ofisa Sili o le pulega o le Lakapi Samoa le tofa Seumanu Douglas Ngau Chun, o le talia ai e le Matagaluega o Tina ma Tamaitai Atinae o Afioaga ma Agafesootai o le latou talosaga, o se avanoa tāua lea e faia ai se sao o le taaloga lakapi i taumafaiga e taofia sauāga i totonu o Samoa.
O le afioga i le Minisita o lea matagaluega a le malo le tofa Lagaaia Tiaituau Tufuga na saunoa i le faamautūina o le tuuina atu o vaegatupe ma ia faailoa le tāua tele o lea taumafaiga a le malo i le una’ia o polokalame e taofia ai sauāga.
Le Minisita o le Matagaluega o Tina ma Tamaitai Atina’e o Afioaga ma Agafesootai le tofa Lagaaia Tiaituau Tufuga.
O le vaevaeina o le selau afe tala ua tauaao ai e le Lakapi Samoa, ma faalapotopotoga o le Soul Talk Samoa, Salvation Army ma le Samoa Rejuvenate Youth Group seleni mo a latou polokalame.
O le sauniga foi lea i le Aso Gafua o lenei vaiaso na faamautū ai le sainigalima a lea matagaluega ma le faalapotopotoga o le Toomaga mo ē Puapuagatia mo le faamatuuina iai o le vaegatupe e 200 afe tala mo a latou polokalame e tetee atu ai i sauāga.
