E to’aiva le ausiisii u’amea mamafa a Samoa ua filifilia mo taaloga a le vaega matutua ma le vaega laiti poo le senior ma le junior o le a faia i Fiti, i le faamoemoe o ia taaloga e saili ai ni avanoa mo taaloga a Malo o le Taupulega ua faamoemoe e faia i le isi tausaga o muamua nei.

O le ‘au ua filifilia ua aofia ai tamaitai e to’atolu ma alii e to’aono.

I le vaega o tamaitai ua filifilia ai le tamaitai o Ele Opeloge le pine siliva a Samoa i taaloga a le Olimipeka e avea ma faia’oga ma o le ‘au lea ua aofia ai le tamaitai 15 tausaga le matua o Seine Stowers ua filifilia mai i le polokalame siisii u’amea mamafa o loo auai fanau aoga a le atunuu.

O le ‘au a tamaitai ua aofia ai Seine Stowers o le a tauva i le mamafa e 76 kilokalama, o Avatu Opeloge i le mamafa e 81 kilokalama, ma Lesila Fiapule i le 87 kilokalama.

I le ‘au a alii ua filifilia iai Nevo Ioane o le a tauva i le 67 kilokalama, John Tafi o le a sii i le 73 kilokalama, Jack Opeloge i le vaega o le 96 kilokalama, Don Opeloge i le vaega o le 102 kilokalama, ma Maeu Nanai Livi ma Sanele Mao o le a tauva i le sii e 109 kilokalama.

O le ausiisii u’amea mamafa foi lea a Samoa o le a malaga ai ma nisi o tamalii e to’alua ua lautogia mo le taimi muamua e avea ma laufali mai lo tatou atunuu ua iai agavaa ma tomai e faatautaia ai lea taaloga.

O i la’ua ia o Ola Salimu Lui ma Niusila Opeloge.

E 20 afe le meaalofa tupe a le National Bank of Samoa ua tuuina atu e fesoasoani ai i le ausiisii u’amea mamafa a Samoa o le a tausinio i ia taaloga i Fiti e faia i le vaiaso lona tolu o le masina fou o Setema.