A o loma le faai’uga o le vaiaso nei e faalauiloa aloa’ia ai le tamaitai ua avea ma tausala o le Miss Samoa Universe, o le tamaitai o Haylani Kuruppu sa avea ma Tausala o Samoa, ma maualuga foi lona tulaga i le tauvaga o le Miss Global i le tausaga na te’a nei, o ia lea ua avea ma Miss Samoa Universe o le a fai ma sui o le atunuu i le tauvaga lona 73 e saili ai tausala o le atulaulau le Miss Universe, e faia i le masina o Novema o le tausaga nei i le atunuu o Mexico.
O le kamupani telefoni feavea’i o le Vodafone Samoa o le lagolago autū lea o tapenaga a le tamaitai o Haylani mo lea tauvaga tele a le lalolagi. O Aperila o le tausaga nei na faailoa ai le ofi atu o Samoa i lea tauvaga tausala, ae o Haylani o se tamaitai e lē gata na manumalo i le pale o le Tausala Samoa o le setete o Vitoria i Ausetalia, ae na manumalo foi i le tauvaga o le Tausala o Samoa i le tausaga e 2022.
O le tausaga na te’a nei na avea ai ma tausala o le Miss Samoa Global ma ofi atu i le sailiga o se tausala o le kelope lea na ia ausia le tulaga lua poo le first runner up.
