I le mae’a ai o le fono faafaletui a le Vaega Faaupufai a le Labour i le vaiaso nei ua faailoa mai ai nisi o suiga tetele e ala i tofiga Minisita lea ua filifilia ai se tasi o tamalii faipule, o ia foi o le faipule o Mana, le tamaitai Samoa o Barbara Edmonds e seei mai le tofi Minisita o Mataupu Faalotoifale, Minisita o Tagata Pasefika, faapea le Minisita Lagoalgo mo le Soifua Maloloina o le Pasefika faapea le Housing. 

E pei ona silafia o se tasi lea o suiga na faailoa e le Palemia ia Chris Hipkins mo le Labour talu ona tulai mai e tauave le tofi ina ua faamavae Jacinda Ardern. 

Ua suia nei e le tamaitai ia Barbara Edmonds le afioga Aupito Tofae Su’a William Sio lea na ia tauvaeina le tofi Minisita o Tagata Pasefika mo le tele o tausaga. 

O nisi o nei suiga e aofia ai Kieran McAnulty lea ua faasee atu o se sui o le kapeneta e na te tauaveina nisi o galuega sa galue ai Nanaia Mahuta, Minister of Local Government, Minister for Emergency and Management ma ua filifilia foi e avea ma sui taitai o le Maota. 

O le susuga Ginny Anderson lea ua faaofi atu i le kapeneta ma tauaveina tofi o le Minister of Digital Economy and Communications, Minister of Senior, Minister of Small Business. 

Ua filifilia foi Dr Ayesha Verrall i le tofiga minisita o le Soifua Maloloina lea sa tauavea  Andrew Little. 

E talitonu le Palemia o suiga nei o le a mafai ona tino mai ai ni suiga lelei mo Niu Sila a o faaauau ai pea le tulai mai o le Labour e avea ma vaega faaupufai e taitaia le malo seia oo i le isi faigapalota.