Ua faailoa e faia’oga Ulu o le aulakapi e i lalo o le 20 tausaga le matutua mo le taamilosaga o le Ipu o atunuu i le li’o o le Oceania, ma le ‘au mo le taamilosaga o le Rugby World Pacific Challenge.

Ua faailoa e le faia’oga mo le ‘au e i lalo o le 20 tausaga le afioga Galumalemana Rudolf Moors le to’a 30 ua filifilia, faapea foi ona faailoa e le faia’oga o le Manuma mo le taamilosaga o le Rugby World Pacific Challenge le 28 o alii talavou ua fili mo lea taamilosaga. O i latou ua filifilia e mai kalapu lakapi i totonu o iuni faaitumalo i Upolu ma Savaii.  

I taaloga a Malo o le Taupulega o loo faagasolo i Birmingham i Peretania, e 24 atunuu ua faamanu’aina i pine talu ona amata ia taaloga faavaomalo. O loo aofia ai ma Samoa i le 24 lea o atunuu ua maua pine, e pei ona faamauina le pine siliva e tasi mo le tatou ‘au masii mai taaloga siisii u’amea mamafa.

O Ausetalia o loo tulaga muamua i le taimi nei e 31 pine auro, 20 siliva ma apamemea e 20 i le aofa’iga e 71 pine. O loo pito iai Egelani i le aofa’iga o pine ua latou maua e 54, e aofia ai auro e 21, 22 pine siliva ae 11 apamemea. O loo tulaga tolu Niu Sila e 13 auro, 7 siliva ma apamemea e 4, aofa’iga o pine mo le taimi nei e 24. O Samoa o loo i le tulaga 20 i le aofaiga o pine ua ia maua.