Ua faailoa e le Faletupe o Atinae a Asia (Asian Development Bank) le faafiafiaina i le faamuamua a le malo o Samoa o loo ave i le toe fetuutuuna’i o faiga ma auala poo reforms e saga siitia ai taumafaiga o atina’e i le vaega tuma’oti poo le private sector, ina ia faaleleia ai tulaga tau tupe maua.

O i ua auala mai ai le fesoasoani tau tupe o se grant mo Samoa e 7 tesimale 8 miliona tala.

Ua faamatuu mai lea fesoasoani tau tupe ma faailoa ai e le Faletupe o Atina’e a Asia, ua ogatasi lana fesoasoani ma faiga faavae o le atina’e a le Malo o Samoa lea ua faataatitia ai auala e toe fausia ai le tulaga manuia o taumafaiga tau i le atina’e o tagata ona o aafiaga mai le faama’i Koviti-19.

O malo o Ausetalia ma Niu Sila faapea  le Faletupe o le Lalolagi (World Bank) o loo faatupeina le isi vaega o le fesoasoani lenei, e pei ona sa gafa le faalapotopotoga o tupe a le lalolagi o le IMF poo le International Monetary Fund ma le faataotoina o le auivi o lea polokalame tau i le atina’eina o le vaega tuma’oti.

O le tausaga e 2022 na afea ai foi Samoa i le isi fesoasoani tupe mai lea lava faletupe e 7 tesimale 5 miliona tala ma ua faamauina ai se siitaga e 3 miliona tala o fesoasoani tau tupe a le Faletupe o Atina’e a Asia mo Samoa i le tausaga nei 2024.

O loo taula’i nei fesoasoani a le faletupe i lana mau tauave talu mai le tausaga e 1966, ia tafiesea le ola mativa ma le lē tagolima o tagata soifua i atunuu e vaivai tamaoaiga.