Ua faailoa e fomai GPs i Aukilani i Saute o le fuafuaga a le Pharmac e saunia avanoa mo le faia o tuipuipui o le fanau ma talavou mai le Meningococcal B, o se fuafuaga tāua tele e alofia ai le toe pepesi o lea faamai.
Peitai ua faailoa se finagalo o se tasi GP mai Papakura i le One News Dr Primla Khar o le silasila i le faataunuuina o le faiga o nei tuipuipui ma faamautinoa o loo sa’o tuipuipui e maua e komiuniti e tāua tele lea i le sologa lelei o lenei fuafuaga.
O le taimi nei o le tuipuipui o le Bexsero o loo mafai ona faatupeina mo na o tagata o close contacts o se tasi ua aafia i le meningococcal pe o loo iai i se tulaga lamatia ona o tulaga tau le soifua maloloina.
O le taimi nei o loo sailia e le Pharmac ni finagalo faaalia o tagata i se fuafuaga e faatupe ai le tuipuipui lea o le meningococcal mai ia Mati 2023 mo tamaiti e oo atu i le 12 masina le matutua aemaise o se polokalame tulituliloa ai i latou e amata mai le 13 tausaga agai i luga tausaga seia oo atu ia Aokuso 2025.
