O loo tuufesilisili nei le to’atele o tagata i le faaitu o Clendon poo le ā tonu o loo tula’i mai i se tasi o tuatusi i le faaitu lea na vaaia ai le tumutumu o leoleo ma taavale maliu na vaaia o aga’i ese mai ai atoa ma leoleo su’esu’e i o latou laei papa’e e faatino ai su’esu’ega.
Na amata mai i le Aso Tofi le vaaiga lea i lea nofoaga ma o loo ta’ua i le Herald i le aso ananafi na vaaia se tino maliu o aveina i totonu o se tasi o taavale maliu ma fai mai nisi o tuaoi e talitonuina na maua atu lea tinomaliu i lea fale.
E talitonuina e to’alua tagata matutua ma ni tamaiti se to’alua e aumau i le fale lea ma pe ua atoa nei le ono masina e pei ona ta’ua e le leitio faavaomalo a Niu Sila.
O le faamatalaga mai leoleo e faapea e lē o iai se lamatiaga i tagata lautele ae o loo faia a latou su’esu’ega ma o le a faailoa mai nisi faamatalaga pe a mae’a su’esu’ega o loo faatino.
O loo lipotia foi na vaaia le faatū o se faleie i le driveway o le fale lea ma le au su’esu’e i suti papa’e na aga’i ane ai, fai mai tuaoi pe ā ma le valu taavale a leoleo o loo laina i le alatele ma o loo talitali pea poo le ā tonu ua tulai mai i lea tuatusi. Fai mai nisi tuaoi o isi tagata sa aumau muamua i le fale lea e masani lava ona asiasi atu iai leoleo aemaise foi le vaaia ai o le ‘au tietie pasika.
O loo faatalia nei la se lipoti lata mai o lea faalavelave.
