O loo fia malamalama vave mātua o le tamaititi e 8 tausaga e iai manaoga tumau pe na mafua i se ā ona tuua na o le la tama i totonu o se pasi a le aoga i le fale o le avepasi.
Ua lipotia e le 7News o le mataupu lenei o loo tulai mai i Adelaide ma o le tamaititi 8 tausaga lea e iai manaoga tumau sa i totonu o le pasi a le aoga ma sa piki mai lo latou fale e momoli i le Modbury Special School peitai e lei taunuu.
Fai mai o le tamaititi e le tautala ma sa faateia le tina ina ua maua atu se faaaliga i le app a le aoga e fesiligia ai pe aoga le tamaititi.
Na maua mulimuli ane si tamaitti o loo loka ai lava i totonu o le pasi na o ia ae o loo paka le pasi i le fale o le avepasi.
Fai mai le lipoti pe ā ma se itula na iai si tamaititi i totonu o le pasi ma ua matuai le fiafia si ona aiga. Ua faia le suesuega a le matagaluega o aoga i lenei mataupu ae lē o le taimi muamua foi lea ua tulai mai ai tulaga faapea.
