O loo fia feiloa’i le minisita o fale, Megan Woods i le komesina o aiātatau a tagata soifua.
Ua sau ai lea lipoti i le mae’a ai ona faatalosaga e le komesina o Paul Hunt ina ia faatumau le siitia o tau o fale mautotogi se’i tau faamāmā ai le avega i le taimi a o taugata le soifuaga.
O le Aso Lua o le vaiaso nei na faaalia ai e le komesina e lē o faigofie i le to’atele o tagata e maualalalo tupe maua, aiga e na o le to’atasi le tagata faigaluega atoa ai ma fanau aoga.
O se tasi o itu na aapa iai le malo i le amataga o le Koviti i le 2020, ina ia taofi mo le ono masina le sii o le tau o fale mautotogi, ma o lea ua toe talosaga le komesina e toe aumai.
Ae i se tali mai a le minisita, na ia ta’ua ai o lea ua tusi i le komesina ma faailoa iai fesoasoani a le malo ua faia, ma ua ia faatalosagaina ai sa laua feiloa’iga.
