Na fai Kerisimasi mai i Samoa le tofa Olalevaoalii Sosene i si ona aiga i Matautu i Lefaga ae na toe foi e fai Tausaga Fou i si ona aiga aemaise o lana fanau i Brisbane i Ausetalia o loo faamautū ai.
O le oso na alu ma ia o le suāvai ma taumafa masani o keke saiga ma pepa o talo chips.
Peitai ua faamatala e Olalevaoalii na fetagaisi ona alo ua feūtia i le mageso o chips ma ua talitonu ai e lē o ni talo ae o taamū chips.
E 15 tala i le taga chips na faatau ai i se poloka i le maketi i Fugalei taga e lima peitai na lafoa’i uma e le’i faaaogāina ina ua oo i Ausetalia ona e feū.
Le tofa Olalevaoalii Sosene i se talanoaga i luga o auala o fesoota’iga faaonapo nei.
Mo le tatou atunuu o loo tapena ai suāvai ma oso mo aiga i fafo pe a toe taliu faigamālōlōga, ia tofo muamua i le pepa chips pe lē o ni taamū ina ne’i mao alu lau seleni ae lē faaaogāina.
