E to’afā se aumalaga o tagata faigaluega sinia o le ofisa o numera faamauina a Samoa poo le Samoa Bureau of Statistics o loo iai nei i Ausetalia i lenei vaiaso i le faamoemoe, e galulue ma nisi o le aufaigaluega o le ofisa o numera faamaumauina a le malo o Ausetalia e maua ai se isi malamalama aemaise o tomai faaopoopo i le galuega ma fetufaa’i ai silafia e faatino ai le aoina ma le tuufaatasia o fuainumera, o se vaega e tāua tele i le atina’e o soo se atunuu ma lona tulaga tau i le tamaoaiga.
O Samoa ma lona atina’e o le tasi lea o vaega tāua tele o le faamaumauina o fuainumera mai soo se auaunaga a le malo ina ia sa’o faamaumauga.
Ae i le tasi o fetufaa’iga o tomai ma malamalama e ala i le polokalame fesoasoani a Ausetalia ua faaigoaina o le Tautai, o le tau amataga o le masina lenei sa malaga ai foi sui o le Matāgaluega o Tupe a le malo e fetufaa’i ma le matāgaluega o tupe a le malo o Ausetalia i Canberra le laumua o lea atunuu.
O le Aso Gafua foi o le vaiaso nei na malaga atu ai i lea atunuu ni tagata faigaluega mai le ofisa o le toe fuata’ina o tulafono poo le Samoa Reform Commission i se polokalame foi faapea ua faamoemoe e mae’a i le aso 28 o le masina nei.
