Ua molia nei se talavou 20 tausaga le matua, tuua’ia i lona tuuina atu lea o se fe’au tusitusia mata’utia e ala i se imeli i nisi o aoga, o le auaunaga o leoleo faapea le faigāmalo.
O lenei fe’au tusitusia o loo faamauina ai lona osofa’ia ai o i latou e ala i lona tafanaina o i latou uma nei.
E tusa ai ma ripoti mai le leitio faavaomalo a Niu Sila, na faailo ai e leoleo o le imeli na tuuina atu ua faaulutalaina “o la’u lea anavatau”.
I ripoti e faapea, na tuuina atu e lenei talavou lana fe’au tusitusia lenei poo le toe 20 minute i le itula e 2 o le vaveao o le Aso Tofi, aso 12 o le masina talu ai, i auaunaga ma a’oga e aofia ai le Kolisi o Waiuku, le Kolisi o Rutherford, le ofisa o leoleo i Pukekohe, le ofisa o leoleo i Te Atatu ma le ofisa o le Palemene.
Faaalia i lenei faufauga fuafuaga uma a lea alii, e aofia ai lona osofa’ia o a’oga ma faatino ai gaioiga o le tafanaina o fanau a’oga, o lona taofia faasolitulafono o tagata ma faaaogā ai ‘au’upega mata’utia e pei o pomu.
Faamanino ua ia lilifa e faatino e fai ia tulaga ona o ia o sē na aafia i sauāga ma faatinoga faalumaluma (bullied), ma o lea ua faia e faasaga tau atu ia i latou na aafia ai o ia.
I le mata’utia tele o nei faamatalaga ma faufauga o lea na faamalosia ai le tapunia o aoga uma o loo aafia i lenei matāupu ma vaaia ai leoleo ua faa’au’upegaina i fafo ane o le kolisi o Rutherford.
I se taimi mulimuli ane, na faailo ai e leoleo sa faatino sa latou sa’ili’iliga i totonu o a’oga uma nei ma na latou mauaina se laau malosi i lona ituaiga o le pump-action shotgun, o se 359 cartridges o le 3D printer, o pepa ma faamaumauga o le faaaogāina o se laau malosi weapon blueprints, ma ni alaga’oa, faaalia e faaaogā i le tuufaatasia ai o se pomu.
Māua ai foi le taofia o ni alaga’oa faaeletoroni (Electronic devices) o loo iai i totonu ni faamaumauga e fesoota’i atu i gaioiga faatupu faalavelave e aofia ai ma faamaumauga i le tagata faatupu faalavelave lea na faia le gaioiga faalealofa i Kalaiesetete.
O loo teena e lenei talavou ona moliaga ma o le masina o Iulai o le a faatino ai taualumaga o le faamasinoga o lenei matāupu.
Puna o Faamatalaga: https://www.rnz.co.nz/news/national/591295/armed-man-allegedly-sent-manifesto-to-schools-govt-promising-to-become-nz-s-most-deadly-mass-shooter
