O le polokalame tau aoaoga a Niu Sila ua ta’ua o le Manaaki New Zealand Scholarships Programme ua na ofoina se fesoasoani tāua i le galulue faatasi ma le Faalapotopotoga o pisinisi i Samoa, e ofoina a’oa’oga mo tupulaga talavou i lo tatou atunuu e le o maua ni galuega.
O se tasi lea o fesoasoani a le Malo o Niu Sila mo le vaega o pisinisi tuma’oti i Samoa i le faamoemoe e fausia ai ni avanoa e mafai ona agavaa ai tupulaga o atunuu o le Pasefika ma Samoa, e maua ni galuega.
O le autu ia mafai e tupulaga ona fai ni o latou sao i le atina’e o tamaoaiga o o latou atunuu.
Ua mae’a se aoaoga sa faia i le motu o Upolu, ae ua tapena nei le laasaga lona lua o le a oo atu ai le fesoasoani i tupulaga talavou o le motu i Savaii.
O le masina fou o Me seia oo i le masina o Iuni o le a faatautaia ai se tasi aoaoga tāua i tomai amata i galuega tau fesootaiga televavave i lalo lava o lea fesoasoani a Niu Sila.
