Ua faailoa le ofo atu e le Faalapotopotoga a le Yazaki Kizuna Foundation o avanoa sikolasipi mo nisi o fanau aoga i le Iunivesite Aoao a Samoa.
O lea fesoasoani na faailoa lea i le vaiaso nei e le Faalapotopotoga faatasi ai ma le Pulega a le Iunivesitē Aoao a le atunuu. Talu ai ona o le tulaga o loo feagai ai nei Samoa i aafiaga o le pepesi o le faama’i Koviti-19 ma le siitia pea o le numera o i latou ua aafia, ta’ua e le Faalapotopotoga i ni a latou faatalatalanoaga ma le Iunivesitē o le a faailoa ai tulaga o manaoga o fanau e tauala atu i nei sikolasipi.
I se vaega o lenei fesoasoani mo fanau aoga, o le a tuuina atu ai sikolasipi e 50 mo fanau aoga a le Foundation Year poo le tausaga faavae, 20 sikolasipi mo fanau aoga i mataupu tau tikerī ma le 5 sikolasipi mo fanau aoga i mataupu maualuluga faafomai PHD, o se vaega ua na’o le faa tasi ona ofo atu e fesoasoani lea i fanau aoga ona o aafiaga o le Koviti.
Ua faatulaga mai ai o le faalapotopotoga a le Yazaki Kizuna le vaega ua aupito telē le latou fesoasoani e ala i sikolasipi mo fanau o loo aoaoina i mataupu PHD.
Ta’ua e le Peresetene o le Faalapotopotoga Michiyo Hamada o le latou tali lea i le talosaga a le Tapaau o le Iunivesitē le afioga, Professor Aiono Alec Ekeroma ma o le latou naunautaiga ina ia unaia tulaga tau aoaoga mo fanau a le atunuu e ui o loo telē le aafiaga mai le vairusi o loo pepesi nei.
