O lea ua sau le faasilasilaga mai le malo e tauala mai le minisita o femalagaiga, Michael Wood, e $61 miliona ua faamatuu mai mai le paketi o lenei tausaga e faaleleia ai totogi o avepasi.
$30 tala i le itula mo avepasi o loo feoai i le taulaga ma le $28 i le itula mo avepasi o loo feoai i le va o nuu lea o loo taumafai ia ausia.
O loo tuu mai foi le mafai i pulega e filifili ai i totogi mo avepasi e galulue i tua atu o le ta o le 9 i le po.
O se tasi lenei o auaunaga ua fai si umi o faigata le sailiga o nisi ma e leai se vaega o le atunuu e lei lagonaina.
O le amataga o le masina na sau ai le faaiuga a le Metlink o le a taofia mo se taimi le tumau le silia ma le 60 faigamalaga a pasi i Ueligitone ona o le utiuti o avepasi.
O Aukilani o lea foi na tele ina le oo le tele o faigamalaga a pasi ma o le masina o Iulai lea e faia ai le siitaga o totogi o avepasi.
