O le aso muamua o le fonotaga a le Palemene e pei ona amata ona soalaupule ma talanoaina le fuafuaga tau tupe fou a le faigamalo mo le isi 12 masina, na tomua ai le sui ta’ita’i o le Itu Agai i saunoaga faalauaitele.
Sa ia faafetaia ai le tapenaga o le tala faatatau autu fou o le tupe i le silasila a le Malo i le taugata o le soifuaga ma le faataoto atu o se siitaga o totogi e lē gata o tagata faigaluega a le Malo i ona vaega eseese, ae o isi tulaga tofi o le Malo.
O le siitaga foi o le a faamanuaiaina ai faamasino o le faamasinoga maualuga, faamasinoga faaitumalo, ma le faamasinoga o fanua ma suafa.
Peitai ua tāpā e le sui ta’ita’i o le Itu Agai se faamalamalamaga a le Minisita o Tupe ma le faigamalo i le mafuaaga ua maualuga tele ai pasene i siitaga o nisi o totogi, ae o nisi pasene ua maualalo e faasino lea i tofiga faamasino ma sui faipule o le Palemene.
O le tasi o vaega sa fesiligia e le sui ta’ita’i o le Itu Agai le tofa Lauofo Fonotoe Pierre Lauofo Meredith, o le fuafuaga i le tala autu o le tupe e faaaogā se vaega o seleni mai le faalapotopotoga o taui o faalavelave faafuasei e faatupe ai le siitaga o totogi.
E manatu le sui ta’ita’i o le Itu Agai e ao i le Malo ona tatala foi le avanoa i pisinisi tuma’oti latou te faaaogā ai ni tupe mai lea faalapotopotoga a le Malo, auā o loo iai foi lo latou sao e ala i tupe o loo aveese mai totogi o tagata faigaluega ma tuuina atu i lea faalapotopotoga tuma’oti a le Malo.
O le siitia o le totogi pito maualalo poo le manimum wage o le tasi lea o tuualalo a le sui ta’ita’i o le Itu Agai, ina ia silasila iai le Malo.
O le taimi nei o loo faatali i se faaiuga a le Kapeneta i le totogi pito maualalo pe sii pe faatumau pea, e pei ona mae’a tuuina atu iai le lipoti mai sailiiliga sa faatino faatatau i le totogi pito maualalo.
