Ua faaalia nei manatu a le alii Faipule o le Green Party, Teanau Tuiono i le tupe ua faamatuu atu e le malo e tali atu ai i aafiaga o le vaatau o le MNZS Manawanui e pei ona faaleagaina ai ogasami o Samoa.
E manatu Teanau ua fai lava sina laitiiti o lea $6 miliona ua avatu mo Samoa, pe a faatusatusa atu i tulaga pagātia ma aafiaga o le si’osi’omaga na alia’e mai ina ua pa’ulia ma mū le vaatau a Niu Sila.
O lenei matāupu ua atoa le tausaga o taumafai mai, ina ua aafia le vaatau o le HMNZS Manawanui i tai ane o ogasami o le itumalo o Safata, ma fetaia’i ai tagatānuu o lea faaitu ma faafitauli, ua lē mafai ona toe fagotaina ia ogasami talu ai aafiaga i le suāuu; faapea ai ma tagata faipisinisi tau turisi ua lē mafai ona toe aga’i atu nisi i o latou faletalimalo ma ta’eele pe alo ai ni vaa paopao e pei ona masani ai.
O vaega e maua ai alaga’oa a nai tagata ua faaleagaina.
Ua fesiligia e le alii faipule vaega uma na aga’i iai fetuuna’iga o lenei tupe ma māfua’aga ua tasi ai i lenei seleni, poo tonu faamaumauga ma vaega na aga’i iai le faai’uga a le malo mo lea tupe e ave mo Samoa ma ona tagatānuu.
