O le agalelei o nisi o ekalesia ma faalapotopotoga i fafo ma totonu o le atunuu, aemaise o malo o loo fai paaga ma le Malo o Samoa e auala i fesoasoani eseese o loo tuuina atu i le auaunaga a le Matagaluega o le Soifua Maloloina o se agalelei e lē mafai ona galo ae manatua pea, auā o loo maua fua e aunoa ma se tupe a le Malo o alu ai.
O le vaiaso nei ina ua tauaao e le Minisita o le Soifua Maloloina ma nisi o le pulega o lea matagaluega tele a le Malo, pusaoloa e lua o foai o nofoa faataavalevale ma tootoo o le agalelei o le Ekalesia a Iesu Keriso o le Au Paia o Aso e Gata Ai i le setete o Utah i Amerika, na fesili ai le Minisita, le afioga Valasi Luapitofanua Toogamaga Tafito Selesele, poo fea uma o iai ieafu o se foai mai se tasi o ekalesia i le atunuu.
Na tuusa’o le fesili a le minisita i ē o loo vaaia ia fesoasoani a le matagaluega, ona e iai se taimi na ia vaai ai i se pepa iila o loo ufi ai le moega o se gasegase.
Na faailoa e Valasi i lana saunoaga na faafetai ai i le foai o nofoa faataavalevale ma tootoo, e na te manatua e tasi le afe ieafu o lea foai.
Le afioga Valasi Luapitofanua Toogamaga Tafito Selesele, o le Minisita o le Soifua Maloloina.
O le Ekalesia a Iesu Keriso o le Au Paia o Aso e Gata Ai, o se tasi o Samaria agalelei e lē motusia le faaauau pea o ana fesoasoani mo tagata o le tatou atunuu e ala i le matagaluega o le soifua maloloina.
E 2,700 nofoa faataavalevale ma le 800 tootoo o le foai a le ekalesia na tuuina atu i le Minisita ma lea matagaluega i le Aso Lua o le vaiaso nei.
