A o iai i Niu Sila le ta’ita’i o le tatou malo le afioga i le Palemia susuga Laaulialemalietoa Leuatea Polataivao Fosi Schmidt, i lana siiga gasegase ua faailoa e le Palemia i lana upega tafa’ilagi le maua o le avanoa e feiloa’i atu ai i sui o le malo o Isaraelu.
O le sui minisita o le va i fafo o Isaraelu ma le konesula o lea malo sa faia se latou feiloa’iga i le Maota o Samoa i Aukilani o loo iai le ofisa o le Konesula o le malo o Samoa.
O le Aso Tofi o le vaiaso nei na faia ai ia feiloa’iga ma sa talanoaina ai nisi o fuafuaga tau i le atina’e e manuia ai Samoa e ala i sootaga faavaomalo ma Isaraelu.
Sa auai le Konesula o Samoa le afioga Afetama Palusalue Faapo II, ma le Komesina o Fefaataua’iga a Samoa i Niu Sila le afioga Vaatuitui Apete Meredith.
E pei ona silafia ua mae’a ona faailoa e le afioga i le Palemia o le tatou malo le lagolago a le malo o Samoa ia Isaraelu.
