E ui o loo toesea ma le atunuu le ta’ita’i o le malo i lana siiga gasegase talu ona tuana’i le palota tele i le faai’uga o le masina o Aokuso, o le iai pea i Niu Sila o le afioga i le Palemia susuga Laaulialemalietoa Leuatea Polataivao Fosi Schmidt ona o fautuaga a foma’i, ua maua ai ma sona avanoa e feiloa’i ma le Minisita o le Va i Fafo a Niu Sila le afioga Vaovasamanaia Winston Peters, e pei ona sa faia lea feiloa’iga i le ofisa o le Konesula o le malo o Samoa i le aai o Aukilani.
Ua faailoa i auala o faasalalauga a le malo o Samoa, o lea feiloa’iga sa talanoaina ai nisi o matāupu tāua e pei o le va nonofo ai o malo e lua i sootaga faapitoa o Samoa ma Niu Sila, o matāupu o loo faamuamua i fuafuaga tau i le va i fafo o le faigāmalo fou a Samoa, puipuia o tuaoi o atunuu e faasino i lu’itau o le feavea’iina faasolitulafono o fualaau faasāina poo nakoti, matāupu i le atina’eina o pisinisi tuma’oti i Samoa e aofia ai ma le vaega o oloa auina i fafo, faapea ma le matāupu i avanoa o galuega faavaitaimi i Niu Sila.
O le Palemia o Samoa o loo iai le vaaia o matāupu tau i le va i fafo.
